Fahasalamana

Mpianatra voapoizina tany Toliara Niala bala ny minisitry ny fahasalamana

Fahasalamana
Alakamisy 15 Jona 2017

Tsy misy atahorana ny ain’ireo ankizy mpianatra any Toliara tratry ny tsy fahasalamana tampoka taorian’ny fihinana ny ody kankana « Mebendazole 500 » no antony ny talata lasa teo.

Nilaza omaly ny teo anivon’ny Minisiteran’ny fahasalamam-bahoaka tamin’ny alalan’ny Minisitra Mamy Lalatiana Andriamanarivo, fa efa nampiasaina tany amin’ny faritra hafa io fanafody saingy tsy nisy ny fiantraikany tamin’ireo mpianatra nihinana izany. Nametra-panontaniana mihitsy ny tenany hoe sao dia tsy nisakafo maraina ireo mpianatra nialoha ny nihinana ilay fanafody ? Nilaza moa ity farany fa horaisin’ny minisitera an-tanana ny fitsaboana ireo mpianatra ireo. Nambarany ihany koa fa hosokafana ny fanadihadiana mikasika ity toe-javatra ity. Nandray fanapahan-kevitra ny hampiatoana ny fanentanana sy fanomezana ody kankana ho an’ny mpianatra aloha ity Minisitera ity sy ny Minisiteran’ny fanabeazam-pirenena. Mahagaga sy mahatalanjona ihany anefa ny fanehoan-kevitry ny minisitra, izay toa niala bala tamin’ity zava-doza ity sy te hilaza fa tsy vokatry ny ody kankana nomena ireo ankizy no nitera-doza. Andrasana izay ho valin’ny fanadihadiana fa ny zavatra niraisan’ireo ankizy aloha dia taorian’ny fihinana ilay ody kankana no nahavoa azy ireo.Fanontaniana tsy afaka am-bavan’ny maro ny hoe:ara-dalàna tsara ve ireo fanafody ireo, tsy lany andro ve ?Manara-penitra ve nitaterana sy nitahirizana azy mialoha ny nizarana azy.Dia ho hita eo tokoa ny marina raha toa ka misy marina ny fanadihadiana sy tatitra matotra ataon’ny ministeran’ny fahasalam-bahoaka.

Toky R