Fahasalamana

Morafenobe Mandravarava sy mamono ny tazomoka

Fahasalamana
Alarobia 14 Oktobra 2020

Mirongatra izay tsy izy ny aretina tazomoka manerana ny Distrikan’i Morafenobe efa ho tao anatin’ny telo herinandro, araka ny fampitam-baovao avy any an-toerana.

Lany anefa ny fanafody manerana ireo CSBII (Morafenobe renivohitra, Beravina, Andramy, Antranokoaky), izany hoe saika manerana ny distrika iray manontolo. Araka ny vaovao avy any an-toerana dia efa nisy zaza roa vooamarina fa voan’ny tazomoka namoy ny ainy. Efa tapa-bolana no voalaza fa nandefa fanairana tamin’ny tompon’andraikitra foibe ireo tompon’andraikitra any an-toerana, saingy tsy mbola nahazo valiny mahafa-po, ka dia manao antso avo hatrany izahay eto Morafenobe, hoy ny fitarainana sy ny fampitam-baovao. Isan’ny tena namely sy namono olona maro ny tazomoka teto amintsika tamin’ity taona ity, saingy toa adinodino, fa ny Covid 19 no nibahan-toerana kokoa. Isan’ny nambara fa manasitrana tazomoka ny “gélule CVO+”, ka mety isan’ny hampiasaina hiatrehana ny zava-misy tahaka itony any Morafenobe itony izany io.

Toky R