Fahasalamana

Minisitry ny fahasalamana Nijery ifotony ny fanofanana ireo biôlojista

Fahasalamana
Alakamisy 09 Aprily 2020

Nidina ifotony nijery sy nanadihady ny fomba fiasa eny amin’ny Institut Pasteur de Madagascar (IPM) ny Minisitry ny fahasalamana, Pr Ahmad Ahmad, omaly maraina.

Nanaraka ny fizotry ny fanofanana ireo Malagasy mpahay momba ny Biôlojia, ao amin’ny “laboratoire de virologie”. Nisantatra izany moa ireo Biôlojista avy any Mahajanga sy Fianarantsoa, hanaraka aorian’izy ireo ny Biôlojista avy eto Antananarivo indray no hahazo fanofanana. Nomarihan’ny minisitra fa ireo Biôlojista voahofana ireo dia hiasa avy hatrany any amin’ny Faritany satria efa nahazo fiofanana teorika sy pratika. Hanaraka izao fampiofanana izao ny fampitaovana ireo mpiasan’ny fahasalamana. Nisy rahateo ny fanambaran’ny Filoham-pirenena fa hovelomina ny laboaratoara maro eto amin’ny nosy indrindra manoloana izao fisian’ny valanaretina coronavirus izao. Nisy mihitsy aza ny antontan’isa noresahina fa hahatratra 1000 isan’andro ny fitiliana ho vita rehefa mitsangana ireo, ary ho vita ny fiofanan’ireo biôlojista, izay neken’ny IPM ny hanofana azy. Hatreto, dia tsiahivina hatrany fa 150 hatramin’ny 200 raha be indrindra ny fitiliana vita eny amin’ny IPM isan’andro. Ireo TDR (Test de diagnostique Rapide) rahateo aza, dia mbola mila hamarinina eny amin’ity ivon-toerana ity ihany vao manan-kery.

Toky R