Fahasalamana

Mararin’ny pesta eny Ambohimiandra Notoloran’ny CUA bodofotsy

Fahasalamana
Alakamisy 09 Novambra 2017

Tsy mikely soroka amin’ny fanasoavana ny tanàna sy ny mpiara-belona ny eo anivon’ny kaominina Antananarivo (CUA), indrindra amin’izao vanim-potoana sarotra diavin’ny vahoaka izao.

Ankoatra ny fanatsarana sy fanavaozana ny fotodrafitrasa isan-tsokajiny dia mandeha hatrany ny asa sosialy ataon’ny CUA, ka ireo olona manaraka fitsaboana noho ny valanaretina pesta indray no nisitraka izany. Nanatitra bodofotsy ho an’ireo mararin’io valanaretina io teny amin’ny hopitaly Ambohimiandra mantsy ny Sampana misahana ny fahasalamana avy ao amin’ny kaominina Antananarivo Renivohitra, notarihin’ny Talen’ny Fahasalamana Deris Herivonona omaly alarobia 08 novambra 2017. Areti-mandoza izay nampihorohoro ny teto Madagasikara iray manontolo ny pesta, efa miha-manjavona kosa izy ankehitriny vokatry ny fepetra maro noraisina. Raha ny hita teny an-toerana dia miha-vitsy ireo marary ao amin’ ity toeram-pitsaboana iray eny amin’ ny boriborintany faharoa ity . Izany dia vokatry ny ezaka goavana izay ataon’ny tompon’andraikitra. Nankasitraka ny fanomezana nomen’ny kaominina ireo marary sisa tavela.

Toky R