Fahasalamana

Mampitandrina ny mpitsabo “Tazo, gripa, aretin-kibo izao no tena mamely”

Fahasalamana
Alarobia 30 Desambra 2020

Ny aretina mateti-pitranga izao dia ny aretin’ny fahavaratra, hoy ny dokotera mpitsabo, Fidy Bariniaina.

Ny tazo no tena betsaka amin’izao andro mafana izao. Fotoanan’ny moka moa. Marary an-doha, manakotsako, misy fanaviana, ao koa ny bemangovitra, mangorangorana nefa efa mafana be. Izay ny tazo. Mbola eo koa ny gripa madinika miaraka amin’izay. Ny mampiavaka an’ireo fotsiny dia hoe ambony be ny hafanana amin’ny tazo. Ny aretin-kibo koa mamely satria fotoanan’ny orana. Eo ny voankazo toy ny manga izay maha be lalitra. Ny telo ampahefatr’ ireo mitsabo tena raisinay izao dia saika ireo aretina 3 ireo daholo no mahavoa azy. Maro ny fisorohana azo atao toy ny fanotofana ny rano miandrona, ezahana hakatona mialohan’ny haha maizina ny andro ny trano, tandremana ny fahadiovan’ny tanana, manatona dokotera raha misy tsy metimety. Mila atao an-tsaina hatrany koa, hoy hatrany ity mpitsabo ity, fa mbola anatin’ny fotoanan’ny Coronavirus isika izao ary azo eritreretina ny mety hisian’ilay izy amin’ny endriny vaovao ka mila hajaina hatrany noho izany ireo fepetra ara-pahasalamana efa napetraka.

J. Mirija