Fahasalamana

Lakandranon’Andriantany Nodiovin’ny kaominina Antananarivo Renivohitra

Fahasalamana
Alarobia 06 Desambra 2017

Nirotsaka an-tsehatra nanadio mivantana ny lakandranon’Andriantany mandalo etsy Ankadimbahoaka omaly, ny kaominina Antananarivo Renivohitra (CUA) notarihin’ny Ben’ny tanàna Lalao Ravalomanana mivady.

Nampiasan’izy ireo ilay fitaovana raitra sy manara-penitra hahafahana misikotra ireo karazana fako manentsina ity lakandrano ity mihitsy izany hisorohana ny tondra-drano mety hitranga mandritra ny fotoam-pahavaratra. Nanentana avy hatrany ny mponina eny Ankadimbahoaka Ramatoa Ben’ny tanàna Lalao Ravalomanana hanaja ny fahadiovana sy ho saro-piaro amin’ny asa vitany. Mendrika ny hiaina amina tanàna madio mantsy ny mponin’Antananarivo, hoy izy izay nomarihiny fa tsy hijanona ho an’ireo mponina eny Ankadimbahoaka ihany fa hiitatra amina faritra maro. Notsindriany manokana fa hovatsiany toeram-panariam-pako ihany koa Ankadimbahoaka ary tsy andrasana isan-taona intsony ny ady hatao amin’ny pesta fa hiainana isan’andro mihitsy. Ny APIPA no manao ity asa tanterahin’ny kaominina Antananarivo renivohitra ity saingy noho ny fifampiandrasana dia noraisin’ny kaominina mivantana. Tonga nifampitafa tamin’ny vahoakan’Ankadimbahoaka teny an-toerana ny mpanolotsaina manokan’ny Ben’ny tanàna Atoa Marc Ravalomanana.

Pati