Fahasalamana

Kaominin’Ivato Notondrahana fanafody maimaim-poana ny isan-tokantrano

Fahasalamana
Talata 31 Oktobra 2017

Na dia tsy mbola nahitana olona iray matin’ny aretina Pesta aza hatreto ny ao amin’ny kaominina Ivato dia mitohy hatrany ny asa fanadiovana tanterahin’ny kaominina, raha araka ny fanazavan’Andrianjakarivony Manitra, lefitra voalohan’ny Ben’ny tanana ao an-toerana.

Ankoatra ny asa fanadiovana faobe tanterahina in-droa isan-kerinandro raha araka ny fanazavany dia notondrahina ranom-panafody daholo ihany koa ny tranom-panjakana, ny sekoly rehetra, ny fiara fitateram-bahoaka eny hatrany amin’ny tokantrano tsirairay avy. Nanampy azy ireo tamin’ny fanatanterahana izany ny Ministeran’ny Fanajariana ny tany izay nanolotra karazam-pitaovana maro toy ny kofafa, sobika, angady, borety…Mikasika ny fitsinjovana ireo ankizy mpianatra manokana moa dia fantatra fa nanaja ny lamina napetraky ny Ministeran’ny Fanabeazam-pirenena avokoa ireo sekoly rehetra ao amin’ity kaominina iray ity ka ny 06 Novambra ho avy izao avokoa vao hiverina an-tsekoly ny mpianatra. Na izany aza efa vonona amin’ny fiatrehana ny aretina pesta avokoa ny sekoly rehetra toy ny fametrahana ivon-toerana manokana ho an’ireo ankizy ahiahiana ho marary, ny fampiasana ireo karazam-pitaovana fitsapana hafanana mialohan’ny hidirany ny sekoly…

Pati