Fahasalamana

Hopitaly miaramila eny Ampahibe Mampiasa fitaovana avo lenta

Fahasalamana
Alatsinainy 27 Aogositra 2018

Notokanana ny sabotsy teo tetsy Ampahibe ny hopitaly miaramila faritra voalohany na ny Infirmerie de Garnison teo aloha. Ny filoham-pirenena,

Hery Rajaonarimampianina moa no tonga nitokana izany teny an-toerana ary niaiky fa anisan’ireo vitsy mba tsy ilazana hoe tsy misy amin’ireo hopitaly eto an-toerana no manana fitaovana avo lenta fanaraha-maso ireo marary any anaty efitrano fameloman’aina. Ity hopitaly ity anefa misy izany, hoy izy. Ankoatr’izay moa dia ahitana efitrano fandidiana maromaro koa ny hopitaly, raha ny fanazavana hatrany. Mitsabo ny miaramila sy ny sivly ity hopitaly ity, misy ao aminy ny sampandraharaha momba ny vonjitaitra (urgence), ny fitsaboana nify, ny departemanta iray miandraikitra manokana ny fanaintainana azo avy amin’ny homamiadana. Hita eny amin’ity hopitaly miaramila ity ihany koa ny laboratoara arifomba fanaovana fitsirihana maro samihafa. Tafiditra ao anatin’ny ezaka ataon’ny fanjakana amin’ny ilay hoe fitsaboana manatona vahoaka ny fanavaozana ity fotodrafitrasa teny Ampahibe ity. Tsy mbola vita ny asa ka mampirisika anareo aho mba hazoto sy hanohy ny ezaka hatrany, hoy ny filoha Rajaonarimampianina.

J. Mirija