Fahasalamana

Hopitaly HJRA Ampefiloha Zaza sima sy vaky lanilany 30 nodidiana maimaimpoana

Fahasalamana
Talata 23 Aogositra 2022

Tafakatra an-tapitrisany ny vola lanin’ny Ray aman-dReny iray amin’izao raha handidy ireo zaza sima na sanatria vaky lanilany.

Mitaky manam-pahaizana manokana mantsy ny fandidiana azy ireny ankoatra ireo fikarakarana maro samihafa tsy maintsy hatao.Zaza sima na vaky lanilany mihoatra ny 30 no nahazo fandidiana maimaim-poana tao amin'ny hopitaly HJRA Ampefiloha nanomboka ny 15 hatramin'ny 19 Aogositra lasa teo. Izany no natao dia mba hahafahana manampy ireo olona tsy manana fahefana ny hisitraka fandidiana ny sima na vaky lanilany. Ireo mpilatsaka an-tsitrapo avy amin'ny Operation Smile in Madagascar no nifanome tanana tamin’ny Ministeran’ny Fahasalamam-bahoaka nentina nanatanterahana izany. Tsiahivina moa fa anisan’ny vaindohan-draharahan’ny ministera ankehitriny ny fanatsarana hatrany ny fandraisana an-tanana ny fahasalaman’ny Reny sy ny zaza hahafahana manamaivana ny fahasahiranan’ny isan-tokantrano.

Nangonin’i Pati