Fahasalamana

Hopitaly Befelatanana Nahazo "couveuse" vaovao

Fahasalamana
Talata 13 Desambra 2016

Mahatratra 32,61 % ny tahan'ireo zaza teraka eto amintsika isan-taona ho an'ny mponina miisa 1.000.

Voakasik'izany manokana ny eto Antananarivo toerana misy ny hopitalim-panjakana Befelatanana izay mandray zaza vao teraka 16 isan'andro raha kely miampy ireo 80 hafa voatery tazonina eny amin'ny hopitaly. Tato anatin'ny volana maromaro izay dia nisedra olana vokatr'izay hamaroan'ny mpiteraka izay ity hopîtaly iray ity ka anisan'ireny ny tsy fahampian'ny fitaovana, indrindra fa ny handraisana an-tanana ireo zaza tsy ampy lanja. Ny iray amin'ireo couveuse miisa efatra eo anivon'ity hopitalim-panjakana iray ity ihany mantsy sisa amin'izao fotoana izao no mandeha, antony nanosika ny vondrona Star hanolotra couveuse iray ho azy ireo mitentina 13 tapitrisa Ar. Omaly no nanolorana tamim-pomba ofisialy io fitaovana io notronin'ny minisitry ny fahasalamam-bahoaka Andriamanarivo Lalatiana. Fantatra fa mandray zaza tsy ampy lanja miisa 400 isan-taona ity hopitalim-panjakana iray ity. Efa nahazo ny anjarany ny hopitaly Sainte Fleur tamin'ny taon-dasa, hetsika izay tafiditra ao anatin'ny fitsinjovana ny maha olona sahanin'ny vondrona Star avokoa.

Pati