Hopitaly Befelantanana

Notsidihin’ny governemanta manokana

Fahasalamana
Alatsinainy 24 Novambra 2025

Nitsidika ny reny sy ny zaza ary ireo

mpiasa ao amin’ny hopitaly Befelantanana ny praiminisitra Rajaonarivelo Herintsalama Andriamasy omaly 21 novambra 2025. Nosafidiany manokana ity hopitaly ity, hoy ny fampitàm-baovao, noho ny nisedràny ireny tifitra baomba mandatsa-dranomaso sy karazan-tifitra nandritry ny hetsi-bahoaka nitakiana fanavaozana ireny. Nandritry ny fitsidihana niarahan’ny lehiben’ny governemanta sy ny minisitry ny fahasalamàm-bahoaka, Dr Managna Moria, dia tsy nisalasala ny talen’ny hopitaly nizara sy nampahafantatra azy ireo ny tsy fahampian’ny fitaovana sy ny faharatsian’ny fotodrafitrasa ary ny tsy fahampian’ny mpiasa isan-tsokajiny. Nisy tamin’ireo olana nifampizaràna no nahitàna fanafana teo noho eo, raha nampanantena kosa ireo tomponandraiki-panjakàna fa tsy maintsy ho vahàna ny sisa ambiny, hoy hatrany ny fampitàm-baovao voaray mikasika hopitaly notsidihin’ny solontenan’ny governemanta manokana omaly izay. Tsy mendrika ny malagasy sy ny hasina mahaolona raha ny toerana ipoiràn’ny aina no ratsy kolokolo, hoy ny praiminisitra, ka tsy maintsy itondràna fanovàna anaty fotoana fohy izany. Sarobidy loatra ny ain’ireo taranaka, hoy izy.
Nangonin’i J. Mirija