Fahasalamana

Hopitalin’ny zaza Ambohimiandra Ny aretim-pivalanana no tena mahavoa ny ankizy

Fahasalamana
Alakamisy 17 Mey 2018

Vitsiana sisa ireo zaza marary entin-dray aman-dreniny manatona sy manaraka fitsaboana etsy amin’ny hopitalin’ny zaza Ambohimiandra ankehitriny.

Efa tapitra tanteraka mantsy ilay fotoana mandomando nampahazo vahana ny viriosy manafika ny taovam-pisefoana raha araka ny fanazavan’ny dokotera David ka tsy misy intsony ireo mikohoka sy sempotra. Na izany aza anefa dia nomarihiny kosa fa mbola betsaka ireo ankizy lasibatry ny aretim-pivalanana. Vokatry ny viriosy hafa indray no mahatonga izany, hoy izy saingy tsy mihoatra ny 24 na 48 ora dia voafehy ny aretina ary sitrana 100 %. Nomarihiny manokana fa ilay tsy fahampian-drano no tena atahorana mafy amin’ny zaza rehefa lasibatry ny aretim-pivalanana izy ireny, antony tsy maintsy hampiasaina ilay rano nokarakaraina manokana iray sy valo. Tonga nitsidika ireo zaza tsaboina ao amin’ity hopitaly iray ity ny fikambanana Compassion Madagascar ny fiandohan’ny herinandro teo, notronin’ireo mpiasan’ny Airtel. Ny mba hahafahana mampifaly ireo ankizy tazonina ao amin’ity hopitaly iray ity no tanjona sady hampaherezana ny fianakaviany ihany koa fa tsy irery izy ireo. Narahina fizarana kilalao sy vatomamy izany notronin’ny tale jeneralin’ny Airtel Atoa Maixent Bekangba. Hetsika efa fanaon’ity orinasam-pifandraisana iray ity moa ny fitsinjovana ny ankizy madinika tahaka izao ho fiarovana sy fanajana ny zon’izy ireny.

Pati