Fahasalamana

Partagé sur :
• facebook

Mampitaraina fatratra ny olon-drehetra ny fitsaboan-tena eny anivon’ny hopitaly ankehitriny, indrindra raha tojo aretina sy tratry ny loza tampoka.

 Raha ny fanadihadiana natao tamina raim-pianakaviana iray tratry ny lozam-pifamoivoizana nentina tetsy amin’ny hopitaly HJRA Ampefiloha dia nahatratra 2 hetsy Ar ny vola laniny tapak’andro mahery monja. Tao ny fitarafana tsy maintsy natao tamin’ilay tanany voalaza fa tapaka, ny fanjairana ny vaky tamin’ny handriny, ny vidim-panafody, ny seraoma tsy maintsy napetaka taminy. Fa betsaka lavitra noho izany ny vola lanin’ireo mpiteraka eny anivon’ny hopitalim-panjakana, antony mahatonga ny sasany hisafidy avy hatrany ny hopitaly tsy miankina. Nahatratra 1 tapitrisa Ar mantsy ny vola lanina renim-pianakaviana iray nijoro vavolombelona niteraka teny Atsimondrano teny ka nodidiana. 2 hetsy Ar no vidim-panafody nalaina taminy, 1 hetsy Ar kosa ny hofan’ny trano fandidiana. Manginy fotsiny ny hofan-trano izay manomboka amin’ny 10.000 Ar ka hatramin’ny 30.000 Ar isan’andro miankina amin’ny sokajiny, ny vola nomena ilay anésthesiste, ny dokotera mpandidy eny hatramin’ny mpamafa trano … Maty raha vao tsy manam-bola ka miditra hopitaly, hoy ny ankamaroan’ny olona nanaovana fanadihadiana ka anaovana antso avo amin’ny fitondram-panjakana. Amin’ny ankapobeny anefa dia ny fitsaboan-tena raha tojo tsy fahasalamana, ny sakafo hanina ary ny asa no tena maha olona ny olona iray.

Pati

Tia Tanindrazana

Samia mijoro ho an'i Gasikara.