Fahasalamana

Partagé sur :
• facebook

Nahazo efitrano fandidiana zaza ny eo anivon’ny hopitaly oniversitera Joseph Ravoahangy Andrianavalona etsy Ampefiloha.

 Ny Vivo Energy no angady nananana sy vy nahitana izany, fotodrafitrasa vao notokanana afak’omaly alakamisy hariva, notarihin’ny minisitry ny fahasalamam-bahoaka Andriamanarivo Mamy Lalatiana sy ny tale jeneralin’ny Vivo Energy Atoa Kader Maiga. Ahitana efitrano maromaro io trano fandidiana vaovao io. Anisan’ireny ny efitrano fiomanana, ny efitrano fandidiana, ny efitrano fanairana ny marary  ary ny efitrano fiandrasana ho an’ireo mpiandry marary.  Misy ihany koa ny trano fidiovana manokana. Tanjona amin’ny fananganana izao foto-drafitrasa izao ny hahafahana mandray an-tanana avy hatrany ireo zaza marary mafy mila fandidiana maika tonga mandalo eo anivon’ity hôpitaly iray ity fa tsy miandriandry toy ny teo aloha intsony. Tamin’iny taona 2017 nivalona iny moa raha tsiahivina  dia nahatratra 1.734 ireo ankizy nodidiana tao amin’ity hopitaly iray ity ka ny 1.008 tamin’ireo dia nila fandidiana maika avokoa raha 5.030 ireo marary. Afa-pahasahiranana tanteraka ny hopitaly HJRA ankehitriny vokatry ny fisian’ity efitrano fandidiana ho an’ny ankizy ity, izay marihina fa tena manara-penitra tanteraka. Tsiahivina moa fa anisan’ny asa tena imasoan’ny Vivo Enregy eto amintsika ankehitriny ny fanatsarana ny fiainana ara-tsosialin’ny mponina ka anisan’ireny ny fahasalamam-bahoaka.

Pati

Tia Tanindrazana

Samia mijoro ho an'i Gasikara.