Fahasalamana

Gripa sy ny fanaovana dokotera tenany Mety mahafaty raha manano sarotra ny fitrangany

Fahasalamana
Alakamisy 15 Febroary 2018

Mety mahafaty ilay gripa mahery, indrindra raha manano sarotra ny fitrangany nefa tsy entina manatona dokotera na tobim-pitsaboana fa anaovana dokotera tenany.

Izay no nambaran-dRatsirarson Joséa, sekretera jeneraly eo anivon’ny minisiteran’ny fahasalamam-bahoaka, omaly, rehefa nanontaniana ny mikasika ity aretina iray ity izy. Notsindriany fa ireo olona voan’ny gripa nefa sempotra na maneno ny tratrany no tena atahorana na koa ireo milempona be ny kibony rehefa miaina. Mila oxygene mantsy ireny karazan’olona marary ireny ka tsy vitan’ny any an-tokantrano intsony ny fitsaboana azy fa tsy maintsy manatona tobim-pitsaboana. Tsara sy mety ny manatona tobim-pitsaboana raha vantany vao tsy salama hahafahana mitsabo haingana ny aretina. Nomarihiny manokana fa viriosy no mahatonga ity gripa mahery eto amintsika ity ka tsy misy ny tena fanafodiny fa ny fisotroana ranobe sy ny fampiakarana hery fiarovana ao anaty no tena hahafahana miady aminy. Tafiditra ao ny fihinanana sakafo ara-dalàna sy be otrikaina arahin’ny tsy fanaovana vizaka loatra. Ho an’ireo tsy voa moa dia ny tsy fifaneraserana amin’ireo efa marary no tena vahaolana tsara indrindra.

Pati