Fahasalamana

Gripa miparitaka etsy sy eroa Tsy manao reraka be loatra no fisorohana azy

Fahasalamana
Zoma 09 Febroary 2018

Tsy vokatry ny loto akory fa vokatr’ireo karazana viriosy mifindra amin’ny olombelona samy olombelona ary mahazo aina rehefa somary mangatsiaka ny andro ilay gripa mahery mahazo ny ankamaroan’ny olona amin’izao, hoy Atoa Ratsirarson Joséa, sekretera jeneraly eo anivon’ny ministeran’ny fahasalamam-bahoaka.

Tsy voatery ho amin’ny vanim-potoanan’ny ririnina anefa izy io no mitranga, hoy izy fa rehefa milatsaka ny hafanana dia efa mahazo aina izy, toy ny zava-nitranga taorian’ny rivodoza AVA farany teo iny. Na izany aza dia tsy hatahorana hamono ity karazana gripa iray ity ankoatra ireo olona efa tena antitra be na koa ireo mbola menavava. Vahaolana tsotra ny tsy fifaneraserana amin’ireo olona voan’ny gripa ho an’ireo te-hiaro tena amin’ny aretina. Toraka izany koa ny fanasana tanana amin’ny savony matetika, arahin’ny fanapenana ny vava rehefa mievona. Tsy manao reraka be loatra ny olona mba tsy ho voan’ny gripa ary mila mihinana voankazo sy hisotro ranobe hatrany, hampitomboana ny hery fiarovana ao anaty. Ho an’ireo efa marary kosa dia nomarihiny fa mila manao tampim-bava ao an-trano mba tsy hifindran’ny aretina. Tsiahivina fa ny 15 %-n’ny olona any amin’ny distrikan’Ambohidratrimo no fantatra fa voan’ity gripa mahery ity, 9 % any Vohipeno, tarehimarika vonjimaika tonga eo anivon’ny minisiteran’ny fahasalamam-bahoaka.

Pati