Fahasalamana

Partagé sur :
• facebook

Mandrahona hanao hetsika fanairana ho fitakiana ny fanalana ny talem-paritry ny fahasalamana amin’ny toerany ny mpiasan’ny fahasalamana ao amin’ny foibem-paritr’i Sofia.

 Sakana ho an’ny fampandehanana ny asa sady manapotika ny tetikasa natao ho an’ny vahoaka ny fisian’io tompon’andraikitra io, araka ny taratasy nalefan’ny mpiasa avy tao amin’ny « Centre hospitalier de référence régionale Antsohihy », nisolotena ireo namany, tany amin’ny sampandraharahan’ny fitsirihana ny asam-panjakana (Inspection d’Etat) tamin’ny 30 oktobra 2018 teo saingy tsy mbola nisy tohiny hatramin’izao. Nomarihin’izy ireo fa efa ratsy fiasa io olona io fony izy médecin-inspecteur tao Antsohihy saingy notendrena ho talem-paritra ihany tamin’ny 2015 noho ny fananany mpiaro andoavam-bola (écolage) aty ambony, araka ny rehareha ataony amin’izay manakiana azy. Sady mpanampatra fahefana no ratsy fitantanana io tale io, hoy ireo mpiasany. Santionany nampahafantarina ny inspection d’Etat ny fivarotany fiaram-panjakana roa, nolazainy fa simba, ny fanagiazany ny moto avy amin’ny tetikasa MAHEFA, ny fitazonany ho azy ny famatsiam-bola 13.000.000 Ar avy tamin’ny tetikasa GAVI sy ny tsy nampiasany amin’ny tokony ho izy ny vola 2.400.000Ar tamin’ireo fanaovana vaksiny faobe nifandimby ka nampitaraina hatrany ireo superviseurs. Mampanjaka ny fijerena tavan’olona (népotisme) ao amin’ny fitantanana mpiasa ataony  ka ailiny avokoa ireo tsy mifandrairay aminy fa soloany an’ireo mpanaraka an-jambany ny baikony.  Aorian’ny fialana  nenina dia hiroso amin’ny dingana henjankenjana kokoa amin’ny fitakiany, ho fiarovany ny asam-bahoaka ao amin’ny faritra ireto mpiasan’ny fahasalamana ato amin’ny Faritra Sofia ireto.

Ntsoavina Evariste

Tia Tanindrazana

Samia mijoro ho an'i Gasikara.