Fahasalamana

Fitsaboana ny “Hépatite B Mila 1 tapitrisa Ar isan-kerinandro

Fahasalamana
Alarobia 09 Aogositra 2017

1 tapitrisa Ar isan-kerinandro raha kely ny vola ilaina ho an’ireo mararin’ny aretina Hépatite B eto amintsika, raha araka ny fanazavan’ny profesora Rakotovao Luc ;

tale teknika lefitra eo anivon’ny hôpitaly Befelatanana. Tsy maintsy mandritra ny 48 herinandro anefa no hanaovana izany fitsaboana izany raha mbola te-ho velon’aina. Eo an-danin’izay anefa dia efa tafakatra 25 % amin’izao fotoana izao ireo olona lasibatr’ity aretina ity eto amintsika,. Vokatry ny fanaovana firaisana ara-nofo sy ny amin’ny alalan’ny rà raha araka ny fanazavany hatrany no tena mahatonga ny aretina izay tsy ahitana famantarana akory ho an’ny 90 %-n’ny marary. Mba hisorohana ny aretina tsy hihanaka loatra ary dia hisy manomboka izao ny famarotana ny vaksiny iadiana amin’ny aretina Hépatite B amin’ny vidiny 40.000 Ar ho an’ireo karazany telo raha 140.000 Ar no tena vidin’izany amin’ny andavanandro. Haparitaka manerana ireo toeram-pivarotam-panafody rehetra eto amintsika izany izay ezahina hitohy hatramin’ny faran’ny volana Janoary taona 2018. Ny orinasa mpaninjara fanafody Sopharmad no handray an-tanana izany izay efa nanolotra vaksiny maimaimpoana ho an’ireo mpiasan’ny sampandraharaha pédiatrie etsy Befelatanana omaly tamin’ny alalan’ny fikambanana Compassion Madagascar, tarihin’ny filohany mpanorina azy Ranjanoro Elodie.

Pati