Fahasalamana

Fitsaboana amin’ny zavamaniry Tokony omena vahana hoy ny HAFARI Malagasy

Fahasalamana
Talata 12 Mey 2020

Tokony omena vahana eto amintsika hoy Rafanomezantsoa Jean Nirina, filoha nasionalin’ny fikambanana Hafari Malagasy ny fitsaboana amin’ny alalan’ny zava-maniry.

Eken’ny lalàna ny fanaovana izany eto Madagasikara hoy izy ary efa misy mihitsy ny sampandraharaha miandraikitra izany eo anivon’ny ministeran’ny Fahasalamam-bahoaka saingy toa takona. Tokony ho reharehan’ny Malagasy ny fananana izany fitsaboana nentim-paharazana izany hoy izy izay manome lanja ireo zava-maniry mampiavaka antsika saingy tsy tokony hafangaro amin’ireo mpanao fahagaga kosa. Manao antso avo amin’ny Filoham-pirenena araka izany Rafanomezantsoa Jean Nirina mba hiady mafy ho an’ny vokatra Malagasy fa tsy hanaiky ho baikon’ny OMS foana. Efa fotoana izao hoy izy hanomezan-danja ny vokatra vita avy amin’ny zava-maniry Malagasy, indrindra amin’izao fotoana mampahazo vahana ny aretina samihafa eto amintsika izao. Ho an’ny fikambanana hafari manokana dia hisy mihitsy ny FITRAMA ( Fitsaboana Traditionnel Malagasy) hatsangany eny amin’ny biraony eny amin’ny 67 ha. Mampiava azy ireo ny fampiasana ilay fitaovana bioscan hijerena ny aretina ao anatin’ny vatana rehetra, ny fampiasana ireo karazam-panafody vita amin’ny zava-maniry izay mampiasa antsika na ilay antsoina hoe : bio, arahin’ny famporisihina ny olona hanao fanatanjahantena sy hanjifa ny legioma hananana fahasalamana mirindra mandrakariva.

Pati