Fahasalamana

Fisorohana ny valanaretina pesta Mifanolo-tanana amin’ny CUA ny Startimes

Fahasalamana
Sabotsy 04 Novambra 2017

Nanolotra ranom-panafody 30 litatra hahafahana manondraka velarantany 20.000m2

hiadiana amin’ny pesta sy fitaovana mifandraika amin’izany miisa 3 niampy takelaka entina hanabeazana miisa 100 ary fitaovana fitifirana sy ranom-pidiovana, ho an’ny kaominina Antananarivo Renivohitra ny orinasa STARTIMES omaly zoma 3 novambra 2017 tao amin’ny Lapan’ny tanàna Analakely. Nandray ny fanomezana tamin’ny anaran’ny kaominina Antananarivo Renivohitra ny lefitra voalohan’ny Ben’ny tanàna, Kolonely Emilien Ramboasalama. Tsy eto an-toerana moa ny Ben’ny tanàna Lalao Ravalomanana fa namita iraka any ivelany. Hampiasaina eny anivon’ny boriborintany enina ireo fanomezana ireo. Efa misy ny laminasa amin’ny fiadiana ny valaranaretina pesta sy ny fanadiovana ny tanàna ka ny talen’ny fahasalamana sy sosialy no mikarakara an’izany. Eo ihany koa ireo mpamafa lalana miampy ny mpisikotra tatatra sy ny eny anivon’ny fokontany. Ny kaominina Antananarivo Renivohitra dia manolotra fisaorana feno ho an’ny orinasa Startimes ary misokatra ho an’ny daholobe ny fifanomezan-tanana. Nanamafy koa ny solontenan’ny Ben’ny tanàna fa mifanojo amin’ny politika sosialin-dRamatoa Lalao Ravalomanana ny hetsika toy izao sady maneho ny fiaraha-miasan’ny kaominina amin’ny tsy miankina.

Toky R