Fahasalamana

Fisorohana ny Pesta Nanadio tokontany hatramin’ny minisitra

Fahasalamana
Sabotsy 13 Oktobra 2018

Hiditra anaty fahavaratra isika ankehitriny, hoy ny minisitry ny fampianarana tekinika sy ny fampiofanana ara-kasa, Lydia Aimée Rahantasoa, raha nanazava ny antony nanatontosan’izy ireo fanadiovana faobe ny tokontaniben’ity minisitera ity tetsy Ampefiloha omaly.

Ilaina, hoy izy, ny mampahafantatra amin’ireo mpiara-miasa fa amin’ny fotoana toy izao ihany koa no mampirongatra ireo valan’aretina vokatry ny loto. Isan’izany ny Pesta. Efa nampahafantatra rahateo ny minisiteran’ny fahasalamana fa 5 izao no efa maty hatramin’ny faha 28 septambra teo. Isan’ny tokony ho arovana amin’izany voalohany ny tontolon’ny fanabeazana izay hamolavolana ireo tanora ho avin’ny firenena. Miara-miasa akaiky rahateo, hoy ny tenany, ny minisiteran’ny fanabeazam-pirenena sy ny anay. Ankoatr’izay, hoy hatrany ny minisitra, dia entanina ny mpiasa hanadio ny isan-tonkatranony avy ary isan-telo volana dia hisy izay fanadiovana faobe izay koa amin’ireo toeram-pampianarana tekinika rehetra. Nitarika ny hetsika fanadiovana ihany koa moa ny minisitra.

J. Mirija