Fahasalamana

Fiparitahan’ny loto eto an-drenivohitra Handray fepetra hentitra ny CUA

Fahasalamana
Talata 03 Oktobra 2017

Ho fitandroana ny fahadiovana eto amin’ny tanànan’Antananarivo Renivohitra (CUA) dia handray fepetra hentitra ny fiadidian’ny Kaominina manoloana ireo loto miparitaka sy fako rehetra manerana ny Renivohitra.

Tafiditra ao anatin’izany avokoa ny mpivarotra entana eny amoron-dalana, ny mpivarotra hani-masaka eny hatramin’ireo olon-tsotra eny anivon’ny Fokontany minia manary fako sy , manao maloto eny rehetra eny. Toraka izany koa ireo manentsina lakan-drano sy ny tatatra ary ireo manaparitaka feno eny an’ elakelan-trano.Ireo sarety sy kalesy tsy manara-dalàna na ireo olona na fiara tsy manaraka ny lalànan’ny fifamoivoizana toy ny fiampitana amin’ny faritra voatokana na “Passage Zébré” dia ho voakasika ihany koa.Aorian’ny fanentanana dia hisy avy hatrany ny sazy ampiharina mifandraika amin’ izany, araka ny lalàna manan-kery efa misy.Hisy ihany koa ny fanaraha-maso hataon’ny “Inspecteur d’Hygiène” eny ifotony.Marihana moa fa efa misy ny toerana voatokana amin’ireny fanariam-pako sy ny fanaovana maloto ireny, koa entanina isika rehetra mba hanaraka ny fitsipika efa napetraka .Manantena ny fahatsiarovan-tenan’ny tsirairay ihany koa ny Kaominina Antananarivo Renivohitra satria soa iombonantsika izany.