Fihaonamben’ny akademian’ny mpitsabo

Nifantohana ny fikarohana momba ireo valanaretina

Fahasalamana
Alatsinainy 02 Desambra 2024

Tontosa ny faran’ny herinandro teo tetsy amin’ny Akademia malagasy etsy Tsimbazaza ny andiany fahatelo

amin’ny andro siantifikan’ny fiarahamonina malagasy ho an’ny fahasalamam-bahoaka. Ry zareo eo anivon’ny akademian’ny fitsaboana na «académie de médecine» moa no nanatontosa ihany koa ny fivoriamben’izy ireo tao anatin’izany, raha ny fampitam-baovao voaray. Nifantohana manokana ny mikasika ny fikarohana momba ireo valanaretina malaza tato ho ato dia ny Aromontana, Pesta, Nendran-drajako. Ny Dr Jean Marie André, izay avy any amin’ny fakiolten’ny fitsaboana any Marseille, Frantsa no nitondra ny famelabelarany tao anatin’izany. Isan’ny nampahafantarina tao anatin’izay ny mikasika ny maha zava-dehibe ny fampiasana ireo tekinika mifanaraka amin’ny toetr’andro hisorohana sy hiadiana amin’ireo aretina ireo. Noresahina manokana ireo areti-mandripaka ireo satria nanova ny fiainan’ny zanak’olombelona ary tena namotika, hoy ny filohan’ny akademia, Pr Ange Andrianarisoa.
J. Mirija