Fahasalamana

Fiatrehana ny pesta Mitavozavoza ny fanjakana, hoy ny CRAM

Fahasalamana
Talata 10 Oktobra 2017

Nanakiana mafy ny fomba fiasan’ny fitondram-panjakana manoloana ny fiparitahan’ny pesta eto amintsika ny eo anivon’ilay vovonana mandalina ny hoavin’i Madagasikara na ny CRAM.

Voalazan’izy ireo tao anatin’ny fanambarana ny lesoka eo amin’ny fanatonana tobim-pahasalamana sy fandraisana an-tanana ireo marary. Tsy ampy ny fanazavana satria nilaza ny avy eo anivon’ny minisiteran’ny fahasalamana fa mahafaty haingana ny pesta mpahazo ny tratra ary raha mikohoka sy misy iray amin’ireto: manavy, marary ny tratra, sempotra, rehoka misy ra dia manatona hopitaly kanefa mbola tokony ho nampiana hoe mitondra vera fanary sy karne ary manaova sarom-bava. Marobe, hoy izy ireo ny saika hanao fitiliana tany amin’ny hopitaly HJRA Ampefiloha saingy nilaza fa tsy afaka nanao fitiliana ary dia nifindra teny Befelatanana. Manana vahaolana hamongorana ny pesta ny kandidan’ny CRAM. Gaga izy ireo fa efa tamin’ny taona 2015 no nisy matin’ity aretina ity niisa 70 kanefa tsy mbola fongotra hatramin’izao.

J. Mirija