Fahasalamana

Fialantsasatry ny pesta Mbola hitohy hatramin’ny 5 novambra

Fahasalamana
Sabotsy 21 Oktobra 2017

Ny alatsinainy 6 novambra ho avy izao indray vao hiverina an-tsekoly daholo ireo mpianatra manerana ireo fari-piadidiam-pampianarana 25 nahitana ny valanaretina pesta, araka ny fanambarana nataon’ny minisiteran’ny fanabeazam-pirenena omaly.

Mbola hitohy haka aina ao anatin’ny fialantsasatry ny pesta ny ankamaroan’ny mpianatra, eny fa na dia ho an’ireo sekoly tsy miankina amin’ny fanjakana aza. Lohalaharana ny fari-piadidiam-pampianarana Antananarivo Renivohitra, Antananarivo Atsimondrano, Avaradrano, Toamasina I, Mahajanga I ary Fianarantsoa. Na izany aza anefa dia hisy hatrany ny hetsika hataon’ny minisiteran’ny fahasalamam-bahoaka amin’ny alalan’ny fanofanana ireo tompon’andraikitra ara-pahasalamana eny anivon’ny sekoly mba hahatomombana tsara ny fandraisana ny mpianatra. Ny alarobia 25 oktobra ho avy izao no hanatanterahana ny hetsika. Anisan’ny tanjona ny hahafahana manara-maso ny fahasalaman’ny mpianatra eny anivon’ny sekoly, ny fametrahana efitrano manokana natao handraisana ireo ahiahiana ho voan’ny pesta, ny fepetra raisina raha toa ka misy marary tokoa. Tsiahivina fa anisan’ny manampy betsaka ny minisitera amin’ny fanatanterahana izany rehetra izany ny OMS sy ny UNICEF.

Pati