Fahasalamana

Fasan’ny Karana Vehivavy iray voadonan’ny taksibe 194

Fahasalamana
Sabotsy 23 Febroary 2019

Sahotaka ny teny akaikin’ny Toby fiantsonan’ny fiara eny amin’ny Fasan’ny karana Ankadimbahoaka omaly atoandro. Fiara iray ao anatin’ny koperativa Mirindra Zotra 194 mantsy no voalaza fa nandona olona teny an-toerana.

Naratra mafy ary tena miady amin’ny fahafatesana io olona voadona io, izay vehivavy ka tena nahiana ny ainy noho ny ratra mafy nahazo azy. Nitangorona avy hatrany ny olona teo anatrehan’ity toe-javatra ity ka nandositra ny mpamily sy ny mpanampy azy noho ny tahotra fitsaram-bahoaka ka navelany teo ilay fiara. Fandehanana mafy no nitarika ny loza. Vao omaly maraina ihany koa no nisy fiara ao anatin’ny zotra 163, iray tarika amin’ny 194 ao anatin’ny koperativa mirindra nidona mafy tamin’ny andrin-jiro teny amin’ny digin’Anosipatrana noho ny fandehanana mafy. Ny resaka fifanenjehan’ny taksibe rehefa sendra lalana malalaka no mitera-doza matetika, ary anisan’ny koperativa andrenesana fitarainana noho ny tsy fanajana mpandeha ireto namoa-doza ireto.

Toky R