Fahasalamana

Fandidiana olona sima An-jatony no ezahina hahazo tombontsoa ao Toliara

Fahasalamana
Talata 30 Oktobra 2018

Olona an-jatony no ezahina hahazo tombontsoa amin’ilay hetsika “opération smile”, handidiana maimaimpoana ireo olona sima any amin’ny faritra Atsimon’ny Nosy karakarain’ny Airtel Madagascar nanomboka ny 20 oktobra lasa teo.

Am-polony hatreto ireo efa nahazo tombontsoa ka anisan’ireny ireo ankizy madinika vaky lanilany sy sima tsy afaka miteny ara-dalàna. Ao amin’ny hopitaly CHU Toliara no hanatanterahana ny hetsika hatramin’ny 2 novambra ho avy izao. Tanjon’ny mpikarakara ny hanamaivanana ny fahasahiranan’ireo olona manana fianakaviana na zanaka sima, indrindra fa ireo sahirana ara-pivelomana. Volabe mantsy no ilaina raha handoavam-bola mivantana sady ilana dokotera manampahaizana sy efa voky traikefa ihany koa.

Miezaka hatrany ny Airtel amin’ny alalan’ny Smile 4 Madagascar mampahafantatra ireo mponina any ambanivohitra ny fisian’io hetsika maimaimpoana io. Tafiditra ao anatin’ny asa fanatsaran’izy ireo ny fiainana ara-tsosialin’ny mponina hiantsorohany izany, indrindra fa ny lafiny fahasalamana.

Pati

Legende : Ireo ekipa manatanteraka ny fandidiana ao Toliara