Fahasalamana

Fanaraha-maso ny valan’aretina Hofanina ireo mpiasan’ny fahasalamana isam-paritra

Fahasalamana
Alarobia 06 Jolay 2022

Arahi-maso akaiky manomboka izao ny fivoaran'ny valan’aretina misy eny anivon’ny fiaraha-monina ho fitandroana ny fahasalamam-bahoaka.

Amin’ny alalan’ny fanamafisana ny fahaiza-manao sy ny traikefan'ny mpiasan'ny fahasalamana no hanatanterahana izany. Natomboka tamin'ny fomba ofisialy omaly araka izany , ny fampiofanana ireo mpiasan’ny fahasalamana voasivana manokana isam-paritra hisehatra amin’ny ady amin’ny valan’aretina eny ifotony, izay tsapa fa mivoatra manaraka ny toetr’andro ihany koa ankehitriny. Araka ny fantatra dia firenena manodidina ny 70 manerana an'i Afrika no efa mampihatra ity paikady iray ity ka tafiditra ao anatin’izany isika eto Madagasikara. Mandritra ny telo volana no hanofanana ireto mpiantsehatra ireto ka aorian'izany dia hizara sy hampihatra ny traikefa azony any amin’ny distrika misy azy avy izy ireo.Tonga nanome voninahitra ny fanokafana omaly ireo delegasiona avy amin'ny Ministeran'ny Fahasalamam-bahoaka izay notarihan' Andriamatoa Minisitra, ny profesora Zely Arivelo Randriamanantany. Vokatry ny fiaraha-miasa matotra eo amin'ny Fitondram-panjakana Malagasy amin'ny alalan'ny Ministeran'ny Fahasalamam-bahoaka sy ny mpiara-miombon’antoka CDC avy any Amerika, sy ny AFENET moa no hahafahana manatontosa izao fiofanana izao.
Nangonin’i Pati
Legende : Nandritra ny fanokafana ny fiofanana omaly