Fahasalamana

Fahasalamana sy ny andro mangatsiaka Mila mihinana sakafo be gliosida

Fahasalamana
Zoma 25 Mey 2018

Efa tafiditra tanteraka ao anatin’ny vanim-potoanan’ny ririnina isika ankehitriny.

Manomboka mahazo vahana ny hatsiaka vokatr’izany izay efa tena mamirifiry tokoa. Mba ialana amin’ireo karazana tsy fahasalamana mety hitranga tampoka ary manoloana ny hatsiaka dia tsara hoy dokotera Ratafika, lehibena tobim-pitsaboana tsy miankina iray eto an-drenivohitra ny manao mafana foana. Toraka izany koa ny fisakafoanana tsara ka anisan’ireny ny fihinana ireo karazan-javatra be gliosida hahafahana mampiakatra ny kaloria ao anatin’ny vatana. Raha mahazo sakafo mamy ( be gliosida ) 1 grama fotsiny mantsy ny olona iray hoy hatrany ity dokotera ity dia mahazo karazana kaloria efatra sahady ny vatany. Toraka izany koa ny fihinana sakafo misy menaka, antony manosika ny olona hihinana voanjo rehefa vanim-potoanan’ny hatsiaka tahaka izao…. Na izany aza anefa hoy hatrany dokotera Ratafika dia ilaina foana ny misotro rano tsy tapaka. Toraka izany koa ny fihinanana sakafo mafana, ny voankazo hisorohana ny sery izay mety hivadika tazo mihitsy amin’ny vanim-potoana tahaka izao. Nomarihiny ihany koa moa fa fotoana fisehoan’ny aretin’ny taovam-pisefoana toy ny kohoka ihany koa ny vanim-potoana tahaka izao ka tokony samy hitandrina ny rehetra.

Pati