Fahasalamana

Partagé sur :
• facebook

Ny fiandohan’ny volana aogositra 2017 no nahitana trangana valanaretina pesta voalohany ka nahafatesana olona 202 teto Madagasikara raha tsiahivina, ny isan’ireo namoy ny ainy tao anatin’ny 4 volana latsaka teo. Ny 27 novambra lasa teo kosa no nambara tamin’ny fomba ofisialy fa resy izy ity ho an’ireo tanàn-dehibe.

2384 isa ireo tranga niseho ka pesta mpahazo ny tratra ny 1828 tamin’ireo pesta aretin-tratra na “Peste pulmonaire” ity namono olona teto Madagasikara ity. Nisy moa ilay andro 1 nanaovana fanadiovana faobe tamin’ny volana janoary teo saingy mahalasa saina ihany ny fanamarihan’ny filoham-pirenena tao anatin’ny filankevitry ny minisitra ny herinandro lasa iny, araka ny tati-baovao  fampatsiahivana nataon’ny minisiteran’ny serasera tamin’ity herinandro ity hoe mila tohizana ny fanentanana momba ny ady amin’ny pesta ataon’ireo departemanta voakasika. Mila hentitra ihany koa ny fanadiovana. Mazava ny resaka eto fa mbola misy toerana atahorana hiverenan’ity aretina ity fa resaka fotsiny ny hoe tsy misy atahorana. Nahenoana tranga rahateo moa vao haingana izay tamin’iny faritra Ankazobe iny. Maro tokoa ireo toerana mbola tena azo lazaina ho feno loto eto Madagasikara, ary mbola manahirana ireo kaominina maro be ny fanangonana sy fanariana ny fako. Tsy mbola misy fomba fiasa maty paika hamotehana na hamadihana ny fako ho zezika eto amintsika, tetikasa ataona orinasa madinika no misy saingy tsy mahasahana ny fako an’arivony sy an’aliny taonina hita etsy sy eroa isan’andro.

J. Mirija

Tia Tanindrazana

Samia mijoro ho an'i Gasikara.