Fahasalamana

Fahasahiranana andavanandro Maro ireo midi-trosa rehefa mitsabo tena

Fahasalamana
Alarobia 11 Mey 2022

Maro ireo mpitsabo velon-taraina amin’izao. Mitombo isa hatrany mantsy ireo marary mila fitsaboana manao tonga trosa. Hafa mihitsy ny zava-nitranga tamin’ny 3 taona lasa hoy ny mpitsabo iray.

Tamin’izany mantsy mbola nahavita nandoa vola avokoa ireo marary fa amin’izao ny ampahatelony dia saika manao trosa avokoa. Raha miisa 9 ireo marary tonga hoy hatrany izy dia ny 3 amin’ireo no tena tsy manan-katolotra mihitsy nefa tena marary mila famonjena. Misy amin’ireny olona ireny no tena tsy mahaloa trosa mihitsy raha misy miverina ihany ny sasany saingy ny ampahany ihany no voalohany. Anisan’ny antony manosika ireo toeram-pitsaboana sasany hanao fizaham-pahasalamana maimaim-poana izany ho fitsinjovana ireo tena sahirana. Ho an’ny Centre Aina Soa etsy Namontana ohatra dia mikarakara fizaham-pahasalamana maimaimpoana izy ireo. Atao Rija Mandimbison, tompon’andraikitra voalohany eo anivon’ity ivon-toeram-pitsaboana ity mihitsy no handray an-tanana ireo marary mandritra izany, hetsika hotontosaina mandritra ny fotoana tsy voafetra. Tanjon’ity centre ity moa ny hanalana fahasahiranana ireo marary tena sahirana , fizahana izay tsy hanavahana aretina. Tsy maninona moa hoy hatrany izy na tsy hitsabo tena aza ilay marary fa hizahana ny teo-pahasalamany fotsiny mba hahafantarany izay tena manjo azy.
Pati