Efa ao Toamasina ny Sambo Mercy Ships

Partagé sur :
• facebook

Nigadona any Toamasina omaly 01 febroary 2024 ny Sambo Mercy Ships.

Hiantsona mandritry ny 2 taona ao an-toerana indray ity sambo goavana ity, hanatanteraka fandidiana "chirurgie" na fandidiana maimaimpoana, ka tsy ny mponin'ny Toamasina ihany no hisitraka izany, fa ny manerana ny Nosy. Hiantohan'ny tompon'andraikitry ny Mercy Ships hatramin'ny saran-dalana andehanana any Toamasina ho an’ireo marary sy ny mpanaraka azy, raha ny fanamarihana. Olona eo amin’ny 1 150 no kendrena hodidiana ao anatin’io, ka iantohan’ny Mercy Ships maimaimpoana ny fanafody. Maro ireo fandidiana atao toy ny hoditra mikainkona, hernie, sima, tongotra bingo, mivonto amin’ny tarehy, cataracte… Maro ny tombotsoa amin’ny fandalovan'ity sambo lehibe ity : toy ireo fitsaboana maro isan-karazany, ny fanavaozana ireo fotodrafitrasa, ireo fihaonana ara-kolontsaina sy ara-panatanjahantena amin’ireo vahiny sy ny vahoakan’i Toamasina. Eo ihany koa ny fiofanana ho an'ireo mpianatra mpitsabo ao an-toerana, hoy hatrany ny fanazavana. Ny Mercy Ships dia fikambanana iraisam-pirenena nanomboka tamin'ny taona 1978 teto Afrika, ary efa nitsabo 10 volana teto Madagasikara izy ny taona 2015. Efa nanomboka ny novambra 2023 moa ny fisoratana anarana ; Omena antsika miandalana eto ny fandaharam-potoana sy fitsaboana rehefa mahavita fandaminana ireo tompon’andraikitra isan-tsokajiny, hoy ny fampitam-baovao avy any Toamasina.
Toky R

Tia Tanindrazana

Samia mijoro ho an'i Gasikara.