Fahasalamana

Dingana goavana amin’ny sehatry ny fitsaboana Olona iray nahatohitra ny aretina SIDA

Fahasalamana
Alarobia 06 Martsa 2019

Nambarana vondrona manampahaizana tany Seattle Etazonia omaly talata 5 martsa fa nisy olona mitondra ny otrikaretina VIH/ SIDA ka nandresy izany.

Ity no olombelona faharoa voaporofo ara-tsiantifika fa nahatohitra ity areti-mandoza tsy mbola nahitana vaksiny fanefitra ity. Efa nisy olona iray tany Berlin (Allemagne) folo taona lasa izay nahatohitra ny SIDA, izao indray dia nisy olona hafa izay raha ny fantatra dia nanaraka fitsaboana tany Londres (Grande Bretagne). Ny mampitovy ireto olona roa ireto izay notazonina ho tsiambaratelo moa ny mombamomba azy ireo dia noho izy ireo samy nanaovana fandidiana manokana mba hanoloana ny tsokan-damosina. Ka raha ny fanadiihadiana sy ny fanazavana azo dia ny tsokan-damosina nampidirina tao amin’izy ireo no nanana singa nahavita nanohitra ny VIH/SIDA. Tsy azo ambara anefa hoe sitrana tanteraka izy ireo, saingy salama, tsy farofy ary afaka miaina tsara tahaka ny olon-drehetra na dia voan’ny SIDA aza. Tsy hita intsony ilay otrikaretina rehefa natao ny fitiliana. Maro no velom-panantenana ny amin’izao ambara fa dingana iray goavana amin’ny fitsaboana ny SIDA izao, izay mamely olona 37 tapitrisa maneran-tany.

Nangonin’i RTT