Fahasalamana

Didimpoitra foibe Tsy misy resaka politika, hoy ny delegen’ny boriborintany faharoa

Fahasalamana
Alatsinainy 30 Jolay 2018

Ankizy miisa 50 no vita didimpoitra faobe maimaimpoana tetsy amin’ny firaisana faharoa Ambanidia ny sabotsy teo. 2 taona ny zandriny indrindra ary 6 taona no zokiny.

Tafiditra ao anatin’ny fokontany 24 avokoa moa izy ireo, raha ny fanazavana. Nanokatra ny hetsika sy nitarika izany ny delegen’ny boriborintany faharoa, Jacques Razafindraibe sy ireo mpanolotsain’ny tanànan’Antananarivo avy ao amin’ny boriborintany faharoa ary ireo mpiara-miasa aminy. Ny tanjona amin’izao hetsika izao, hoy ny Delege dia ny fitsijovana sy ny fanalana ny fasahiranan’ny vahoaka ary tsy misy resaka politika fa ny fijerena ny sosialim-bahoaka no laharam-pahamehana araka ny vinan’ny ben’ny tanàna Lalao Ravalomanana. Ity delege ity moa izay vao avy nandalo savorovoro tamin’ireo mpiara-miasa noho ny resaka fifampitondrana, volana vitsivitsy lasa izay. Dokotera 2 avy any Anjohy miaraka amin’ny ekipan’ny CSBII Volosarika no nanatanteraka ny fandidiana ary ezaka avy ao amin’ny boriborintany faharoa sy tohana avy amin’ny malala-tanana no nanatontosana ny hetsika, hoy hatrany ny delege.

J. Mirija