Fahasalamana

Dia an-tongotra voalanjalanja Tena mahasalama sy misoroka aretina

Fahasalamana
Talata 15 Janoary 2019

Anisan’ny misoroka aretina maro ny fanaovana dia an-tongotra isan’andro. Anisan’ireny ny aretina diabeta izay mamono olona marobe tokoa maneran-tany, ny hatavezana diso tafahoatra, ny aretin’ny tosidra …

Amin’ny ankapobeny dia manodidina ny ora iray eo ho eo no tokony hanaovana azy isan’andro ho an’ny olona iray raha 30 minitra kosa farafaharatsiny. Misy mahatratra ora telo isan’andro amin’izao raha kely ny dia an-tongotra ataon’ny olona iray vokatry ny fitohanana etsy sy eroa. Lohalaharana amin’izany ireo mponina mody eny Itaosy, Analamahitsy…. 45 minitra isa-maraina ny dia an-tongotra tsy maintsy hataon’izy ireny hivoahana ireo faritra be fitohanana vao afaka mandray taksibe handeha hamonjy asa sy fianarana. Mety mahatratra ora roa izany amin’ny hariva noho ny tsy fisian’ny fitaterana miainga avy any Analakely ka tsy maintsy dia an-tongotra avokoa ny hamonjena fodiana, indrindra fa rehefa avy ny orana. Tena mandreraka ny vatana anefa izany, hoy ny dokotera iray satria mety hatoritory foana ilay mpiasa na mpianatra rehefa tonga any amin’ny toerana alehany. Ankoatra izay dia mora voan’ny tazo ihany koa izy ireny satria rera-dava, indrindra fa ho an’ireo tsy ampy sakafo.

Pati