Fahasalamana

Betafo Antsirabe Mbola tsy milamina ny famatsian-drano fisotro

Fahasalamana
Zoma 15 Septambra 2017

Mbola tsy milamina fa voa mainka mikorontana tanteraka ny fitantanana ny famatsian-drano fisotro madio ao amin’ny kaominina ambonivohitr’i Betafo Antsirabe

taorian’ny nialan’ny kaominina any an-toerana tamin’ny fitantanana izany ka nanomezana azy ny tsy miankina iray. Mijaly ara-pamatsiana rano ny tanànan’I Betafo ankehitriny fa notapahin’ity tsy miankina ity ireo fantsona mitondra izany any an-tranon’olona fa ho soloina vaovao. Nampanantenaina koa ny hametrahana compteur vaovao maimaim-poana nefa compteur efa niasa vidiana 60.000 ariary no kasaina homena ny mpanjifa. Raha mitaraina ny mponina dia hanaovan’ny tompon’andraikitra teny eso manao hoe : “hiady amin’ny Fanjakana ?” ary dia nisy ny fivoriana nitadiavana vahaolana natao nefa toa lasa tsindry hazo lena tian-kano tsy tian-kano no niseho. Soa fa teo ny Garduc mpiaro ny zo sy ny tombontsoan’ny mpanjifa sampana Vakinankaratra izay tarihan-dRatheo na Ratiariniaina Jean Théobert, izay nijoro nanolotra vahaolana amin’ity raharaha ity ka mba hisian’ny fitoniana aloha sy araka ny fangatahan’ny mponina dia tsara aloha ny hampiantohana ny asa ary hijeren’ny ny tompon’andraikitra ambony ny mahakasika an’io mpitantantana rano vaovao io. Tokony haverina koa, hoy ny Garduc ireo paompin’olona sy ny vahoaka notapahina mba hisitrahan’ny olona rano fisotro madio sy ara-pahasalamana indray.

Ntsoavina Evariste