Fahasalamana

Partagé sur :
• facebook

Ny volana Oktobra ka hatramin’ny volana Martsa no tena mampirongatra sy mampahazo vahana ny aretina tefoedra eto amintsika.

Olona 200 mahery tamin’ireo 100.000 nanaovana fitiliana tany amin’ny Faritra Boeny mantsy no fantatra fa lasibatr’izany ka zaza ny ankamaroany. Vokatry ny rano fisotro tsy azo antoka, ny sakafo ratsy masaka ary ny tanana tsy voasasa avy any amin’ny toeram-pivoahana no voalaza fa antony mahatonga izany. Mba hahafahana manafoana io aretina io eto amintsika ary dia nisy omaly ny atrikasa niarahan’ny Ministeran’ny Fahasalamam-bahoaka sy ireo mpiara-miombon’antoka aminy avy eny amin’ny anjerimanontolo nampahafantarana ireo karazana voka-pikarohana momba ny aretina tefoedra sy hitadiavana vahaolana mifandraika amin’izany. Tanjona ny hamoahana paikady hahafahana manafoana io aretina io. Anisan’ny soso-kevitra nivoaka omaly ohatra ny tsy tokony hampandoavan’ny kaominina vola ireo te-hikaka izay efa 200 Ar be izao amin’izao. Raha sanatria ka tratran’ny aretina tefoedra mantsy ny olona iray dia nohazavainy fa hatao eny amin’ny sisin-dalana izany rehefa tsy manana 200 Ar izy ka vao mainka hiparitaka ilay aretina. Toraka izany ihany koa ny fampidirana ny vaksiny hahafahana miady amin’ny tefoedra eto amintsika ho an’ny zaza. Raha araka ny salan’isa navoakan’ny sampandraharaha iraisam-pirenena momba ny fahasalamana moa na ny OMS dia mahatratra 11 ka hatramin’ny 20 tapitrisa isan-taona ireo olona tratran’ny aretina tefoedra manerantany ka ankizy avokoa ny 70%-n’izy ireo.
Pati
Legende : Nandritra ny atrikasa notanterahina tetsy amin’ny Carlton omaly
 

Tia Tanindrazana

Samia mijoro ho an'i Gasikara.