Fahasalamana

Aretina SIDA Malagasy 2279 no voany, maro an’isa ny lehilahy

Fahasalamana
Alarobia 29 Novambra 2017

Ny 0,2%-n’ny Malagasy no mitondra ny otrikaretina Vih/SIDA ankehitriny, izany hoe 2.279 izay efa mihinam-panafody manaraka fitsaboana avokoa.

Eto amin’ny Faritra Analamanga no tena maro an’isa amin’izy ireo, indrindra fa ny eto Antananarivo ka ireo lahy samy lahy miaraka no tena betsaka lasibatry ny aretina, raha araka ny fanazavan-dRazafimandimby Andriamandranto, tompon’andraikitra eo anivon’ny komitim-pirenena miady amin’ny SIDA. Ny faritra Atsinanana sy Analanjirofo kosa no mitana ny laharana faharoa ahitana an’i Toamasina, manaraka azy Bongolava. Mba hahafahana manentana ny mpiara-belona hamantatra ny toe-pahasalamany ary dia hisy ny fitiliana maimaimpoana ny otrikaretina Vih/sida ny sabotsy sy ny alahady ho avy izao eny amin’ny toerana hiaingan’ilay hazakazaka lavitr’ezaka iraisam-pirenena karakarain’ny World trade center, miaraka amin’ny federasiona malagasin’ny atletisma. Tanjona ny hananan’ny isam-batan’olona fahasalamana izay tafiditra ao anatiny ny hazakazaka ara-panatanjahantena tahaka izao. Raha araka ny fanazavan’ny mpikarakara moa dia roa tamin’ireo olona notiliana miisa 215 tamin’ny taona 2016 no fantatra fa voan’ny aretina SIDA izay noraisin’izy ireo niaraka tamin’ny CNLS an-tanana ny fikarakarana azy. Ny alahady 03 desambra ho avy izao moa no hanatanterahana ity hazakazaka ity, izay marihina fa andro iray tsy hisian’ny fiara mandeha mifamoivoy eto an-drenivohitra ihany koa ho fitandroana ny fahasalaman’ny mponina. Ny 01 desambra ho avy izao no higadona eto an-tanindrazana ireo teratany vahiny handray anjara amin’izany.

Pati