Fahasalamana

Partagé sur :
• facebook

Manomboka mahazo vahana manerana ny fonja eto Madagasikara amin’izao fotoana izao ny aretina raboka, araka ny tatitry ny fikambanana Croix rouge iraisam-pirenena.

 Aretina misoko mangina izy io ka ireo tsy ampy sakafo no tena mahita faisana. Amin’ny ankapobeny anefa dia tsy ampy sakafo ny ankamaroan’ireo voafonja eto amintsika. Tsy manana afa-tsy 250 Ar isan’andro isan’olona hiantohana ny sakafo hanin’izy ireo ny fitondram-panjakana ka ny mangahazo maina no foto-tsakafony.  Miezaka ny mifanohana amin’ny fanjakana amin’ny fijerena azy ireny ny fikambanana Croix rouge iraisam-pirenena.  Mitety ireo fonja eto  Madagasikara izy ireo ankehitriny ka misy ny fitiliana ny aretina raboka maimaimpoana tanterahiny, arahin’ny fitiliana ny aretina VIH/SIDA ihany koa. Tafiditra ao anatin’ny sonia fifanekem-piaraha-miasa notontosainy niaraka  tamin’ny minisiteran’ny fitsarana tamin’ny taona 2016 izany ka misy mihitsy ny fampanaovana radio ireo marary. Ny 2/3-n’ireo marary hatreto no fantatra fa tena lasibatry ny aretina raboka. Tena betsaka io salan’isa io, hoy ny dokotera Philippe David, delegen’ny mpitsabo eo anivon’ny fikambanana. Hiezaka izy ireo hanao fitiliana maimaimpoana ireo marary manerana an’i Madagasikara mba tsy ny aretina raboka no antony voalohany hahafaty betsaka ireo olona voafonja eto amintsika. Nomarihiny manokana fa anisan’ny antony tena mampirongatra ny aretina raboka eny anivon’ny fonja ny hamaroan’ny voafonja diso tafahoatra, ny loto, ny tsy fahampian-tsakafo.

Pati

Tia Tanindrazana

Samia mijoro ho an'i Gasikara.