Fahasalamana

Aretina pesta Tokony ho mailo hatrany ny rehetra, hoy ny minisiteran’ny fahasalamana

Fahasalamana
Alakamisy 01 Febroary 2018

Mbola mitohy hatrany ny fanentanana tanterahin’ny minisiteran’ny Fahasalamam-bahoaka mikasika ny ady atao amin’ny aretina pesta amin’izao.

Raha araka ny fanazavan’ny dokotera iray eo anivon’ny sampandraharaha mandray an-tanana ity aretina ity dia ilay fotoana mafibe niparitahan’ny valanaretina no tapitra fa ny vanim-potoana hitrangany kosa mbola mitohy hatramin’ny volana aprily ho. Mbola mipetraka foana ireo toromarika nomena ireo tompon’andraikitra ara-pahasalamana manerana ny faritra tsirairay avy, hoy izy. Antsoina ny laharan-tariby 910 raha sanatria ka mahita na mahare trangan-javatra hafahafa hahafahana mampandre haingana ny tompon’andraikitra. Mikasika ilay tranga tany Ankazobe farany teo moa dia nomarihin’ny teo anivon’ny minisiteran’ny Fahasalamana fa efa nisy ny asa fanondrahana ranom-panafody natao tao amin’ilay sekoly, narahin’ny fanadiovana ny manodidina rehetra.

Tsiahivina moa fa nahatratra 33 ny isan'ireo nararin’ny pesta aretin-tratra nanaraka fitsaboana ny 09 novambra taona 2017 lasa teo. Enina ny isan’ireo narary vaovao tamin’izany raha 1.154 kosa ireo efa sitrana. Iray kosa no namoy ny ainy. Mbola nahitana tranga iray hafa indray anefa tamin’ny tapaky ny volana janoary lasa teo saingy efa sitrana soa aman-tsara ilay olona.

Pati