Fahasalamana

Aretina mamany lava Misy tranga vaovao 4 000 isan-taona

Fahasalamana
Zoma 24 Mey 2019

Vehivavy 5 hatramin’ny 7 no tonga manatona eny amin’ny hopitaly HJRA isam-bolana, hitsabo tena noho ny aretina mamany lava.

Hatramin’ny taona 2008, nanatanterahana hetsika fitsaboana azy io teto amintsika, niarahan’ny minisiteran’ny fahasalamam-bahoaka sy ny tahirin’ny Firenena Mikambana momba ny mponina (UNFPA) dia nahatratra 4450 isa ireo vehivavy efa sitrana raha toa ka 50.000 no isan’ny vehivavy tombanana ho tratrany eto amintsika ary misy tranga vaovao 4.000 isan-taona. Tsiahivina fa vokatry ny fahasarotam-piterahana no mahatonga ny aretina. Lasa misy hirika mampifandray ny tatavia sy ny lalan-jaza, hany ka mivoaka tsy tana any amin’ny fivaviana ny fivalanan-drano kanefa azo tsaboina tsara saingy amin’ny alalan’ny fandidiana. Omaly ny fankalazana ofisialy ny andro eran-tany ho famongorana ny aretina mamany lava teny amin’ny hopitaly CHU-JRA. Lohahevitry ny fankalazana ny " Fanitsakitsahana ny zo maha olona ny aretina mamany lava, andao hatsahatra !"

Marigny A.