Fahasalamana

Aretina homamiadana Maro be ireo Malagasy tsy mahavita mitsabo tena

Fahasalamana
Zoma 09 Febroary 2018

Anisan’ny aretina tena atahorana indrindra amin’izao ny aretin’ny homamiadana. Ireo tany mahantra toa antsika no tena mahita faisana amin’izany izay mandrafitra ny fahafatesan’ny 80%-n’ny mponina ao aminy. Ho antsika eto Madagasikara manokana dia mahatratra 25.000

isan-taona ireo trangan’aretina homamiadana hita ka ny 50%-n’ireo dia homamiadana mahazo ny vehivavy avokoa. Anisan’ireny ny homamiadan’ny nono, ny vozon’ny tranon-jaza…Amin’ny ankapobeny anefa, raha araka ny fanazavan’ny dokotera Randrianarivo Hasinjaka, tale misahana ny aretina tsy mifindra eo anivon’ny minisiteran’ny fahasalamam-bahoaka dia efa lasa lavitra ilay aretina vao manatona tobim-pitsaboana ny 60 %-n’ireo marary ireo. Tsy vitsy ireo mamoy ny ainy, indrindra fa ireo tsy mahatojo ny fitsaboana hatramin’ny farany. Antony mahatonga izany araka ny fanadihadiana natao ny tsy fananam-bola fa eo dia eo ihany koa ny tsy fahafantarana sy ny fiononana amin’ny fihinanana tambavy fotsiny na fanatonana olona milaza fa mpitsabo nentin-paharazana kanefa mpisoloky ny ankamaroany. Nankalazaina omaly tetsy amin’ny hôpitaly HJRA Ampefiloha ny andro maneran-tany iadiana amin’ity aretina iray ity. Natomboka tamin’ny alalan’ny diabe izany entina hanairana ny mpiara-belona. Nanohana akaiky ny hetsika ny vondrona Star izay nanolotra eau vive 500 tavoahangy ho an’ireo mpanao diabe. Hetsika efa fanaon’ny vondrona Star isan-taona moa ny tahaka izao, indrindra fa ny fanohanana ny minisiteran’ny fahasalamana amin’ny fitsinjovana sy ny fikarakarana ny fahasalamam-bahoaka.

Pati