Fahasalamana

Aretina diabeta Mitombo isa ireo marary eto Madagasikara

Fahasalamana
Talata 14 Novambra 2017

Olona iray isaky ny fito segondra no voalaza fa mamoy ny ainy manerana izao tontolo izao vokatry ny aretina diabeta mahazo azy.

Tafakatra hatrany amin’ny 5,1 tapitrisa isan-taona izy ireo raha atotaly ka ireo eo anelanelan’ny 40 ka hatramin’ny 59 taona no tena maro an’isa. Ny antony, raha ny fanadihadiana natao ny fihinanana sakafo tsy ara-pahasalamana toy ireo be menaka, mamy loatra, arahin’ny tsy fampiasam-batana izay ilaina tokoa na dia 30 minitra isan’andro ihany azy. Ho antsika eto Madagasikara manokana dia fantatra fa tsy mitsaha-mitombo ireo olona manatona tobim-pitsaboana ary fantatra fa voan’ny aretina diabeta izay miseho amin’ny endrika maro. Anisan’ireny ny faharerahana be loatra, ny hanoanana lava... Toraka izany koa ireo zaza vao teraka izay voan’ny diabeta sahady aretina nateraky ny tsy fahatombonana nandritra ny fiforonany mbola tany am-bohoka. Hankalazaina anio talata 14 novambra ny andro maneran-tany iadiana amin’ny aretina diabeta, daty napetraky ny sampandraharaha iraisam-pirenena momba ny fahasalamana. Hisy, araka izany, ny fanentanana sy fampahafantarana momba ity karazan’aretina iray ity hotanterahin’ireo tobim-pitsaboana maro isan-karazany eto an-drenivohitra toy ny Amadia eny Faravohitra.

Pati