Fahasalamana

Partagé sur :
• facebook

Tonga tao Mahajanga ireo mpikamban’ny Governemanta nihaona tamin’ireo “Comité de Vigilance pour la Lutte Contre les Epidémies” sy ny mpikamban’ny CCO COVID-19 Boeny, notarihin’ny Préfen’i Mahajanga sy ny Lehiben’ny faritra Boeny mpisolo-toerana, Bazezy Clavelah.

 Ny Ministry ny Raharaham-bahiny, ny dokotera Tehindrazanarivelo Djacoba Liva sy ny Ministry ny Fampianarana ambony sy ny Fikarohana ara-tsiansa, ny profesora Assoumacou Elia Béatrice no nanatanteraka izany iraka izany niaraka tamin’ireo delegasiona namany. Nanotrona azy ireo ihany koa ny Filoha lefitry ny Antenimierampirenena, Rahantanirina Lalao, sy ny solombavambahoaka ary loholona voafidy tao Mahajanga. Nitety fokontany maromaro amin’ny ilany antsinanan’ny tampon-tanànan’i Mahajanga ireto delegasiona ireto nitsidika ireo olona mitondra ny aretina Dengue, izay tazo mahery azo avy amin'ny kaikitry ny moka, raha ny fanazavana. Ankoatra izay dia hametraka paik'ady izy ireo ho famongorana ity valan’aretina ity miaraka amin’ireo mpitondra eny ifotony. Nitohy omaly alatsinainy 4 sy anio Talata 5 may ao an-drenivohitr’i Boeny ny iraka ampanaovin’ny Filoha an’ireto mpikamban’ny governemanta ireto, raha ny fanazavana hatrany. Nomarihin’ny Ministry ny Raharaham-bahiny, fa na dia eo aza ny fisian’ity valan’aretina ao an-tampon-tanànan'i Mahajanga ity, dia tsy misy akory ny maty fa ny marary ihany no misy ary maimaim-poana avokoa ny fitsaboana azy ireo. Tsiahivina fa 27 ny isan'ireo mararin'ny tazo nanaovana fitilina tany amin'ny “Institut Pasteur de Madagascar” tany am-boalohany ka ny 24 tamin'izy ireo no voamarina fa voan'ny Dengue, hoy hatrany ny fampitam-baovao.

J. Mirija

Tia Tanindrazana

Samia mijoro ho an'i Gasikara.