Fahasalamana

Antenimieram-pirenena Notolorana fitaovana fitiliana ny pesta

Fahasalamana
Zoma 20 Oktobra 2017

Nanolotra maimaimpoana fitaovana fizahana hafanana maromaro ho an’ny Antenimieram-pirenena ny minisiteran’ny fahasalamana hoentina miatrika ny fiparitahan’ny aretina pesta ankehitriny.

Tonga nanatitra izany teny amin’ny Lapan’i Tsimbazaza omaly ny solontenan’ny minisiteran’ny fahasalamana notarihin’i Dr Ratsitorahina Maherisoa ary nandray ireo fitaovana kosa ny Kestora voalohan’ny Antenimieram-pirenena Randrianasoloniaiko Siteny izay nanambara fa “tena ilaina tokoa eto amin’ny Antenimieram-pirenena ireto fitaovana ireto, indrindra amin’izao fotoam-pivoriana izay ivezivezen’ny olona maro be ato an-dapa izao”. Nanatrika ny fotoana ny lehiben’ny sampandraharaha misahana ny fahasalamana eo amin’ny Antenimieram-pirenena Dr Randrianarivony Rolland sy ireo mpiara-miasa aminy, ny talen’ny kabinetran’Atoa Kestora voalohany, Awel sy ny sekretera jeneralin’ny Antenimieram-pirenena, Ratsimba Andrianaivo Mamy.

Nangonin’i Jean D.