Fahasalamana

Antananarivo Renivohitra Ho afaka ao anatin’ny iray volana ny fako rehetra

Fahasalamana
Alakamisy 26 Oktobra 2017

Ho afaka ao anatin’ny iray volana ny fako rehetra manerana ireo Boriborintany enina eto Antananarivo Renivohitra.

Io no fanamby napetraky ny kaominina Antananarivo Renivohitra omaly, nandritra ny fampahafantaran’izy ireo ny fahatongavan’ilay fiara lehibe mpamafa lalana sady mpandraraka rano ary mpanondraka THT hahafahana miady amin’ny aretina pesta. Toerana maro no nanaovana andrana toy ny teny Ambohidahy hatreny Mahamasina, toerana hiangonan’ny mpivarotra marobe tokoa, anio alakamisy. Raha araka ny fanazavan-dRamatoa Lalao Ravalomanana, Ben’ny tanànan’Antananarivo dia hiasa andro aman’alina ity fiarabe ity, hitety ireo boriborintany rehetra. Hanampy azy amin’izany ireo mpamafa lalana eo anivon’ny kaominina. Vokatry ny fiaraha-miasan’ny kaominina tamin’ny sehatra tsy miankina no angady nananana sy vy nahitana ity fiara ity, niampy ny fanampiana avy amin’ny antoko Tiako I Madagasikara any ivelany. Miantso ny mponina mba samy hitandro ny fahadiovana ny Ben’ny tanàna. Rehefa tsy mandoto mantsy, hoy izy, dia efa naman’ny manadio ihany. Miantso ny isam-baravarana ihany koa ny tenany mba hazoto amin’ny fandoavan-ketra, hahafahan’ny kaominina mividy fitaovana raitra sy manaraka ny fivoaran’ny toetrandro tahaka ity fiarabe vaovao ity.

Pati