Fahasalamana

Ambohitravao Talatamaty Tsy misy pesta izany, hoy ny Ben’ny tanàna

Fahasalamana
Talata 31 Oktobra 2017

Na dia efa nahoraka be aza ny feo fa aretina Pesta no nahazo ilay lehilahy iray nianjera nanoloana ny toeram-pivarotam-panafody tao Ambohitravao Talatamaty omaly maraina dia voaporofo omaly atoandro ihany fa tsy fahatsiarovan-tena nateraky ny fisotroan-toaka diso tafahoatra no nahazo ity farany.

Ny Ben’ny tanàna Rado Razafindratsimba notronin’ny dokotera iray avy eo anivon’ny Ministeran’ny Fahasalamam-bahoaka mihitsy mantsy no tonga nijery ny zava-nisy teny an-toerana no sady nanindrona ny marary tamin’ny HTC amin’ny maha-mpitsabo azy ireo. Nentina avy hatrany tany amin’ny hôpitalin’Anosiala ny marary taorian’izany mba hatao fitiliana ka fantatra taorian’izany fa aretina hafa no nahazo ity lehilahy ity fa tsy pesta izany. Efa nahatsiaro tena soa aman-tsara moa ilay ranamana ity raha araka ny fanadihadiana natao, indrindra taorian’ny nahazoany ny fitsaboana sahaza azy. Miantso ny mponina ao Talatamaty mba ho tony tsara araka izany ny Ben’ny tanana hahafahana manohy ny fiainana andavanandro.

Pati