Fahasalamana

Ady amin’ny kitrotro Zaza 7 tapitrisa no hovitaina vaksiny

Fahasalamana
Alarobia 16 Janoary 2019

Notanterahina teo anivon’ny Primatiora teny Mahazoarivo omaly 15 janoary ny fivoriana mikasika ny valanaretina Kitrotro izay notarihin’ny praiminisitra Ntsay Christian,

niarahany tamin’ireo mpiara-miombon’antoka amin’ny firenena Malagasy sy ireo tompon’andraikitra isan-tsokajiny amin’ny minisitera voakasika. Kendrena ho 95% ny tahan’ny fanaovana vaksiny ny zaza ao anatin’ny efa-bolana ho avy, ka mitotaly 7 tapitrisa ny tanjona. Efa misy ny paikady napetraka, hoy ny fanjakana. Nohazavain’ny praiminisitra fa maro ny distrika no voakasiky ny valanaretina kitrotro ary efa miditra amin’ny dingana voalohany amin’ny fanentanana fanaovana vaksiny isika izao, ka hitohy hatramin’ny volana aprily izany. Fomba roa no hampiasaina, dia ny fijerena ny tarehimarika ahafahana manana fitaovana hijerena ny fivoaran’ny valanaretina, ny faharoa dia ny fanatsarana ny lafiny serasera, indrindra ny fandresen-dahatra amin’ny fanaovana vaksiny, izay hiarahana miasa amin’ireo ray aman-dreny, Tangalamena, sekoly sy ny tompon’andraikitra ao aminy. Hojerena ihany koa ny mikasika ny filàna misy na eo amin’ny lafiny vaksiny na eo amin’ny lafiny ara-bola, ary nambaran’ny praiminisitra fa vonona hanampy ny mpiara-miombon’antoka na amin’ny fividianana vaksiny na amin’ny lafiny fahaiza-manao. Miantso izy mba samy handray andraikitra tandrify azy amin’ny ezaka atao hiadiana amin’ny fipariahan’ny valanaretina kitrotro ny rehetra. Tsy hadinony ny naneho fankasitrahana ho an’ireo mpiara-miombon’antoka, mikasika ny fifanomezan-tanana sy ny fanohanana nahafahana nahatanteraka ny zotram-pifidianana. Tetsy an-kilan’izay dia nomarihin’ny dokotera Manitra Rakotoarivony, talen’ny fampiroboroboana ny fahasalamana eo anivon’ny minisiteran’ny fahasalamam-bahoaka fa ny 95 %-n’ireo ankizy miisa 220.905 manerana ireo distrika 25 no ezahina hahazo tombontsoa amin’ilay vaksiny hatramin’ny faran’ny herinandro, anisan’ireny ny eto Antananarivo Renivohitra, distrika iray izay voalaza fa malaina indrindra amin’ny fanaovam-baksiny.

Toky R