Fahasalamana

Ady amin’ny aretina tazomoka Norarahana ranom-panafody ny tao Ambohijanaka

Fahasalamana
Alakamisy 24 Mey 2018

Mbola mahazo vahana ny aretina tazomoka eto amintsika. Raha tsiahivina, mbola nahatratra sivy ireo olona namoy ny ainy vokatr’ity aretina iray ity hatramin’ny fiandohan’ny taona ka tany amin’ny faritra avokoa ny ankamaroan’izy ireo.

Aretina azo sorohina tsara anefa ny aretina tazomoka sady azo tsaboina ihany koa raha tsy tara loatra ny fahatongavan’ny marary eny anivon’ny tobim-pahasalamana. Mba ho fiarovana ny ain’ny mponina manerana ny Nosy ary dia manatanteraka ilay tetikasa CAID ny fitondram-panjakana amin’ny alalan’ny minisiteran’ny fahasalamam-bahoaka. Fanondrahana ranom-panafody isan-tokantrano no hatao, izay haparitaka manerana ny Nosy mihitsy ho an’ireo kaominina notsongaina. Ho an’ny kaominina Ambohijanaka Atsimondrano manokana dia efa naharitra roa herinandro no nanatanterahana izany, hoy ny Ben’ny tanàna Alain Ratsimbazafy. Nanomboka ny fiandohan’ny volana teo ka hatramin’ny 18 mey izy io. Ny hahafahana mamono ireo moka rehetra miafina any amin’ny toerana takona no tanjona izay nomarihiny fa mahery fofona tokoa saingy tsy maimbo kosa. Tsy noterena ny mponina fa nierana tsara. Ora roa taorian’ny fitifirana ny rindrina sy ny rideau dia efa azo novohana ny trano ary azo hatoriana avy hatrany amin’ny alina.