Fahasalamana

Ady amin’ny aretina homamiadana Hanampy antsika i Inde

Fahasalamana
Alakamisy 16 Mey 2019

Tonga nanatitra ny taratasy maniraka azy ho masoivohon’i Inde eto Madagasikara tetsy amin’ny lapan’Iavoloha omaly alarobia 15 mey , ny ambasadaoro vaovaon’ity firenena ity, Abhay Kumar.

Ny lafiny fahasalamana, ny angovo, ny fambolena ary ny fanabeazana no tena ho votoatim-piaraha-miasan’ny roa tonta manomboka izao raha ny tatitra avy amin’ny seraseran’ny prezidansa. Nampahafantarina tamin’izany fa hisy atsy ho atsy ny masinina fitiliana homamiadana hanampian-dry zareo indianina antsika entina hiadiana amin’ity aretina mahafaty ity. Hisy koa ny injeniera miisa 2 hanome fiofanana momba ny fampiasana ireny fitaovana fisarihana angovo amin’ny alalan’ny herin’ny masonadro ireny ho an’olona miisa 600 hatramin’ny fiafaran’ny taona 2019. Hisy injeniera miisa 2 toy izany koa ho avy hanampy antsika amin’ny fampiofanana momba ny fambolena. Noraisin’ny filoham-pirenena, Andry Rajoelina, taorian’izay koa moa ny ambasadaoro vaovaon’i Polaonina miasa eto amintsika, Jacek Bazanski. Ho azy ireo indray kosa dia ny hanitatra ny fiaraha-miasa eo amin’ny tontolon’ny famokarana lavanila no tena mahaliana azy. Mieritreritra ny hanampy amin’ny alalan’ny famatsiana milina ilaina amin’ny fambolena koa anefa izy ireo, raha ny tatitra voaray hatrany.

J. Mirija